加拿大嘅醫療體制同香港好唔同, 最主要係冇分公立同私立醫院,而你睇專科之前都要得到你既家庭醫生轉介, 而喺香港基本上可以直接去專科到, 當然係out of pocket。
好啦, 冇啦啦點解要睇醫生呢? 事源港童黎到卡加利之後皮膚好乾燥, 一黎天氣乾燥, 二黎呢度啲水係硬水, 乾上加乾, 結果背脊同頸都有濕疹。搽咗一兩個星期Cetaphil Eczema Cream 都冇改善, 晚晚R天光。死死氣就去睇醫生啦, 因為張Alberta Health Card 未到, 都預咗自己比錢。
又由於冇Alberta Health Card, 我哋未有家庭醫生, 唯有求其搵間walkin clinic, 其實都諗住係搵醫生開類固醇。呢次嘅經驗好唔開心, 話說個醫生黎到求其問咗咩事(可否比啲耐性😆😆😆), 咁我做阿媽就解釋啦, 因為係香港係冇濕疹, 又搽咗咩cream, 個醫生一黎就話佢要睇啦, 唔使再講...... 當時未夠兩歲嘅港童又係勁冇安全感, 一見到個醫生都驚驚, 咁我抱住佢諗住比醫生睇下個頸皮膚, 佢就好反感, 我正要解釋比佢知嘅一刻, 個醫生即刻好粗暴大力咁拎佢個頭(我同老公都嚇到反應唔切), 港童即刻嚇到大喊。醫生二話不說就話係濕疹啦, 開啲藥比你地, 呢幾日只用清水沖涼, 完。走咗。PHEW......
反而去到個pharmacy 配藥, 佢地就好有耐性解釋:) 仲同港童玩。BTW Alberta Health Card 都係唔包藥, 所以一係out of pocket, 一係有其他insurance cover。
到後黎我哋收到個Alberta Health Card, 咁就開始搵家庭醫生, 基本上係搵唔到識講廣東話, 因為太爆, 所以我哋都係research下, 睇下啲人嘅comment。結果搵到一個醫生收new patients, 而第一次meet up要等兩個月, 好彩呢段時間冇咩要見醫生。本黎對呢個醫生都唔抱太大希望, 點知佢好到超乎意料:) 解釋咗Alberta / Calgary嘅醫療情況, 又講下如果要入院, 要入邊間........雖然佢唔講廣東話, 但係佢完全滿足到我對家庭醫生嘅期望。總算有個好醫生跟住全家嘅健康。
我見完就記低呢幾個重點
1. 如果有咩事要call白車, 打811, 並非911。
2. 小朋友有事要入院, 可以直接去Alberta Children's Hospital
3. 去到係唔係都報咗你個家庭醫生名, 佢哋可能會有資料exchange
4. Alberta Health Card 唔包藥, 所以大家可能要考慮其他保險或者有工作嘅通常有Group Insurance (呢度嘅藥都唔平, 所以有咩小事, 大家都係去Over-the-counter買藥搞掂)
如果大家想知我哋用邊位醫生都可以inbox, 大家交流下:)
又推介下港童之後用咗Live Clean既Eczema Cream (2% Colloidal Oatmeal )情況好好多, 就唔使用咁多類固醇:)
Comments
Post a Comment