Mrs.HKer嘅第一篇分享，諗咗一陣間要寫D咩嘢，都係寫自己最近既考車經驗啦。
離開香港之前嘅準備
如果你有香港車牌，而且有兩年以上既駕駛經驗，咁可以準備以以下既文件:
1. 未過期既香港駕駛執照
2. Form TD320 (呢個文件係可以親自去運輸處或郵寄去申請就可以，我嗰陣郵寄大約一星期就收到呢份文件加國際牌，國際牌係另一份申請form)
International Driving License (HK)
有咗以上呢兩份文件，咁你係亞省可以節省一年既等待時間。主要係因為亞省既考車牌由Learner Class 7 去到GDL-5中間需要有一年既學習及等待。如果想知道Class 7 同 Class 5 有咩分別咁大家都可以参考以下網址，但大約黎講Class 7 係一個Learner 牌，雖然可以開車， 但係需要有一個Full License 既人坐係隔離先開到。如果你係香港未有車牌， 咁要計返land加拿大既嘅時間， 如果唔夠時間做呢個exemption，咁不如黎到亞省先學，都可以節省下金錢。
當然如果你有香港以外嘅車牌，可以睇返直接換車牌既指引。
亞省考車第一步 - 筆試 (Knowledge Test)
準備考試：坊間都有D考試班， 但係我同Mr. HKer都係就咁睇返佢本Driver's Guide，大家讀嗰陣可以留意返係咪最新版本。
報考試：搵一間最方便你既Registry，唔使預約，拎住以下幾份文件就咁行入去就可以報名啦。
1. 加拿大身份證明文牛
2. 地址證明（當然係Alberta 地址，如果pass咗個筆試，張Class7正本會郵寄到你個地址）
3. 如果有近視記住帶返眼鏡／cons，如果pass 咗個筆試，會即場做埋個視力測試
4. 錢，筆試報名費，同埋如果pass 咗個筆試，要買埋Class 7張牌
更多既資訊， 大家都可以上返Class 7 官網。
考試型式係用電腦，如有需要，你可以提前係counter講用中文版。30題選擇題，啱25題就過關，每答完一題就會知對錯， 所以都好刺激，我第一題就錯咗，真係一額汗。大家可以善用個SKIP，對於唔太肯定既問題可以SKIP留到最後先答。如果你連續答啱25題個考試就會停，直接話你知你已經pass!!!
如果肥咗，可以直接走人，當然第二日可以再黎。
如果pass咗，去返個counter，佢會開始同你搞Class 7張牌，呢個時候，你可以比埋香港車牌同張TD320from 佢，咁就會申請埋個Exemption唔使等一年。大家可以隔兩三個星期打返去Registry問下係咪已經approve咗個Exemption，因為係唔會有任何方法主動通知你。
亞省考車第二步 - 筆路試 (Road Test)
Mrs HKer雖然話有香港車牌，但係已經十世冇開過車， 加埋左右肽分別，所以都報咗個十小時嘅學車課程，由學神又開始。
呢十小時既分佈大約係每堂兩個鐘，最後兩個鐘就安排係考路試當日之前。
同考筆試唔同， 路試係要預約，可以上網，每個Registry都有唔同嘅booking page，大家可以睇返想去邊個考場，亦都可以親自去報名。由於我考既係GDL5 Basic，考試都係半個鐘，連考泊車，所以都係Registry附近。如果你想考Class 5 Advanced，咁就考一個鐘，會上埋高速。
先到Registry counter報到，今次只需要帶張Class 7 正本去就得啦，當然仲有錢啦。再去考官度確認資料，搞掂曬之後，考官會叫你上車，開下左右指示燈呀，雨撥等等。跟住就出發啦。老實講我第一次係肥佬，太緊張，同埋個考官勁嚴肅，未考已經知衰😖，但係我都可以分享下我既肥佬心得。
1. 心情真係要放鬆，唔好成日記住頭先自己錯咗咩，諗完又諗，錯完就算，提自己下一次注意，因為同一個錯，佢係可以扣三次。
2. 路口(Intersection) 要留心，左右轉都要留意行人，如果紅燈右轉睇唔到左邊黎既車， 記住行前少少， 唔好估下估下。
3. 泊車，如果後冇車泊係度， 可以拎多D空間，等自己出車嗰陣鬆動D，同埋記住左右shoulder check
我第二次就pass咗， 好大原因係個考官好輕鬆，我都犯咗Ｄ明顯錯誤，自己都意識到，但係大原則，錯完就算，下次提自己。
考完試，返到Registry，個官個同你回顧下個考試，如果想知道係咪pass，可以望下個考官既ipad右下角如果出現一小行紅色字，四個英文字母，咁就知道下次再加油，哈哈哈哈。（我第一次就見到紅色四個英文字FAIL......哈哈哈哈哈）
如果pass，入返去Registry換返個牌就得啦，正本都係郵寄去你屋企。更多資料，大家可以上返Class 5個官網睇睇。
如果第一次肥咗，可以隨時再預約再考，我就隔咗三日。😉
加油！
（如果大家有唔同嘅經驗都分享下，亦都可以message 我哋）
Comments
Post a Comment